مَنْ طَلَبَ الدُّنْيَا حَلَالًا اِسْتِعْفَافًا عَنِ الْمَسْئَلَةِ وَسَعْيًا عَلٰی اَھْلِهٖ وَتَعَطُّفًا عَلٰی جَارِهٖ لَقِیَ اللهَ وَ وَجْهُهُ كَالْقَمَرِ لَيْلَةَ الْبَدْرِ یعنی جس نے خُود کو سوال سے بچانے ،اپنے اَہْلِ خانہ کے لئے بھاگ دوڑ کرنے اور اپنے پڑوسی پر مہربانی کرنے کے لئے حلال طریقے سےدُنیا طلب کی ،وہ اللہ عَزَّ وَجَلَّ سے اس حال میں ملے گا کہ اس کا چہرہ چودھویں رات کے چاند کی طرح روشن ہوگا۔

( مصنف ابن ابی شيبة،۵/۲۵۸،حديث:۷)

حضرت سَیِّدُنا قتادہ رَضِیَ اللّٰہُ تَعَالٰی عَنْہ فرماتے ہیں کہ صحابَۂ کرام عَلَیْہِمُ الرِّضْوَان تجارت تو کرتے تھے، مگر جب انہیں حُقُوقُ اللہ میں سے کوئی حق پیش آجاتا تو تجارت اورخریدو فروخت انہیں ذِکْرُ اللہ سے نہ روکتی،یہاں تک کہ وہ اُسے اَدا کرلیتے۔

( بخاری، ،۲/۹، تحت الباب :۱۱)

حضرت سیِّدُنا مُعاذ بن جبل رَضِیَ اللّٰہُ تَعَالٰی عَنْہ سے روایت ہے کہ دوجہاں کے تاجور،سُلطانِ بحر و بر صَلَّی اللّٰہُ تَعَالٰی عَلَیْہِ واٰلہٖ وَسَلَّم نے ارشاد فرمایا:
بےشک سب سے پاکیزہ کمائی،اُن تاجروں کی ہے، جوبات کریں تو جھوٹ نہ بولیں،جب ان کے پاس اَمانت رکھی جائے تو اس میں خیانت نہ کریں،جب وعدہ کریں تو اس کی خلاف ورزی نہ کریں، جب کوئی چیز خریدیں تو اس میں عیب نہ نکالیں، جب کچھ بیچیں تو اس کی بیجا تعریف نہ کریں،جب ان پر کسی کا کچھ آتا ہو تو اس کی اَدائیگی میں سُستی نہ کریں اور جب ان کا کسی اورپرآتا ہوتو اس کی وُصُولی کے لئے سختی نہ کریں ۔

( شعب الایمان ، ۴/۲۲۱،حدیث: ۴۸۵۴)

حکیمُ الاُمَّت حضرت مُفتی احمدیارخان نعیم رَحْمَۃُ اللّٰہ ِتَعَالٰی عَلَیْہی اپنی کتاب اِسلامی زِندگی میں لکھتےہیں:بیکاررہنا بڑاجُرم ہےاور ناجائز پیشے(اختیار) کرنا اس سے بڑھ کر جُرم،رَبّ تعالیٰ نے ہاتھ پاؤں وغیرہ بر تنے(کام کرنے) کے لئے دیئے ہیں نہ کہ بیکار چھوڑنے کے لئے۔اسی طرح بے مُروَّتی کے پیشے مکروہ ہیں، جیسے ضرورت کے وَقْت غَلَّہ روکنا،حرام چیز وں کے کارو بار حرام ہیں، جیسے گانا بَجانا ، نا چنا ، شِکر ے بازی ، بیٹر با زی وغیرہ ۔جُھوٹی گواہی کے پیشے ایسے ہی شراب کی تِجارت کہ شراب، بیچنا ،بکوانا، خریدنا ، خریدوانا ،وغیرہ۔

(اسلامی زندگی،ص۱۴۴)

یاد رکھئے! دُنیا میں کوئی بھی کام بغیر محنت نہیں ہوتا، مگر تجارت سخت محنت ،چُستی اور ہوشیاری چاہتی ہے ، کاہل سُست آدمی کبھی کسی کام میں کامیاب نہیں ہوسکتا۔ مِثل مشہور ہے کہ بغیر محنت تو لقمہ بھی مُنہ میں نہیں جاتا ،تا جر خواہ کتنا ہی بڑا آدمی بن جائے، مگر سارے کام نوکروں پر ہی نہ چھوڑدے ۔ بعض کام خُودبھی کرے ۔

(کامیاب تاجر کے اوصاف، ص۱۹)

دتاجر کیلئے ایک اَہَم وَصْف حُسنِ اخلاق کا پیکر ہونا بھی ہے، یُوں توہر مسلمان کو خُوش اخلاق ہونا ہی چاہیے،مگرتا جر کو خُصُوصیّت سے خُوش خلقی ضروری ہے، جبکہ بَد اخلاق اور بد مزاج شخص سے لوگ کتراتے ہیں اور ایسوں کے پاس جو گا ہک ایک بار جاتاہے دو بارہ جانا گوارہ نہیں کرتا ۔

(کامیاب تاجر کے اوصاف، ص۱۹)

وَّ جَعَلْنَا النَّهَارَ مَعَاشًا۪(۱۱)

ترجَمۂ کنز الایمان:اور دن کو روزگار کے لئے بنایا۔

فَانْتَشِرُوْا فِی الْاَرْضِ وَ ابْتَغُوْا مِنْ فَضْلِ اللّٰهِ (پ۲۸،الجمعة:۱۰)

ترجَمۂ کنز الایمان:تو زمین میں پھیل جاؤ اور اللہ کا فضل تلاش کرو۔

رِجَالٌۙ-لَّا تُلْهِیْهِمْ تِجَارَةٌ وَّ لَا بَیْعٌ عَنْ ذِكْرِ اللّٰهِ وَ اِقَامِ الصَّلٰوةِ وَ اِیْتَآءِ الزَّكٰوةِ (پ۱۸، النور:۳۷)

ترجَمۂ کنز الایمان: وہ مرد جنہیں غافل نہیں کرتا کوئی سودا اور نہ خرید و فروخت اللہ كی یاد اور نماز برپا رکھنے اور زکوٰۃ دینے سے۔